Walong (8) hauling truck ang ipinagkaloob ng Department of Agriculture (DA)-MIMAROPA-National Livestock Program (NLP) sa walong (8) samahan at kooperatiba ng mga magsasaka sa rehiyon. Ang inisyatibang ito ay bahagi ng Integrated National Swine Production Initiatives for Recovery and Expansion (INSPIRE) program, na layuning tugunan ang hamon sa industriya ng babuyan dulot ng African Swine Fever (ASF).
Ang bawat truck, nagkakahalaga ng Php2.83 milyon, ay naipamahagi mula Nobyembre 6 hanggang Nobyembre 28 sa iba't ibang probinsiya: Oriental Mindoro, Occidental Mindoro, Palawan, at Romblon. Ang mga tumanggap nito ay ang mga sumusunod:
Occidental Mindoro:
- Occidental Mindoro Hog Raisers Agriculture Cooperative (San Jose)
- Ligaya Multi-Purpose Farmers’ Cooperative (Sablayan)
- Bukang Liwayway Multi-Purpose Cooperative (Sablayan)
Oriental Mindoro:
- Sta. Maria Agrarian Reform Community Cooperative (Naujan)
- Gloria Sustainable Agri-Association (Gloria)
- Calsedeco Multi-Purpose Cooperative (Socorro)
Palawan:
- Narra Irrigators and Advocate Multi-Purpose Cooperative (Narra)
Romblon:
- Saint Vincent Ferrer Parish MPC (Ferrol)
Tatlong Swine Multiplier Farm, Pinasinayaan
Kasabay ng pamamahagi ng hauling trucks, pinasinayaan din ang tatlong (3) swine multiplier facilities sa Oriental at Occidental Mindoro na nagkakahalaga ng Php10 milyon bawat pasilidad. Ayon kay Dr. Ma. Teresa Altayo, Regional Focal Person ng Livestock Program, ang mga pasilidad na ito ay biosecured at climate-controlled upang masiguro ang kalinisan at kaligtasan ng mga alagang baboy laban sa anumang sakit.
“Inilunsad ang programang ito noong 2019 upang suportahan ang swine industry na labis na naapektuhan ng ASF. Sa unang yugto, nakatanggap ang mga rehiyong apektado ng sakit, habang sa ikalawang yugto, kasama ang mga green zone areas tulad ng MIMAROPA,” paliwanag ni Dr. Altayo.
Ngayon, dahil sa ASF outbreaks sa apat na probinsiya ng rehiyon, pansamantalang ipinagpaliban ang operasyon ng mga pasilidad. Hinikayat ni Dr. Altayo ang LGUs na magsanib-puwersa upang maiangat ang kanilang zone status. Bukod dito, tiniyak niya ang masusing biosecurity measures, kabilang ang environmental swabbing, upang matiyak na ligtas sa ASF ang bawat baboy na ipapasok sa probinsiya.
Positibong Pananaw sa INSPIRE
Ayon kay Dr. Nanette Rosales, OIC Regional Technical Director for Research and Regulations, malaki ang maitutulong ng INSPIRE program sa pagpapalakas ng swine industry sa rehiyon. Binanggit niya ang mga benepisyo tulad ng pagkakaroon ng matatag at sustainable na suplay ng dekalidad na baboy sa pamilihan, pagiging sentro ng makabagong kaalaman para sa swine farming, pagpapataas ng kita ng mga magsasaka.
“Sa ganitong paraan, pinalalakas natin ang mga komunidad upang maging susi ng kaunlaran hindi lamang para sa kanilang sarili, kundi para sa buong rehiyon,” aniya.
Ang mga proyektong ito ay patunay ng dedikasyon ng DA-MIMAROPA sa pagpapatatag ng agrikultura at pag-aalaga ng kabuhayan ng mga magsasaka sa rehiyon. Sa pamamagitan ng sama-samang pagsisikap ng pamahalaan, LGUs, at mga farmer cooperatives, inaasahang hindi lamang muling makababangon ang industriya ng babuyan mula sa hamon ng ASF, kundi magkakaroon din ng mas masagana, mas matatag, at mas progresibong kinabukasan para sa lahat ng nasa sektor ng agrikultura sa MIMAROPA.
