Sa ugnayan ng Kagawaran ng Pagsasaka – MiMARoPa na pinangangatawanan ni Agricultural Production Coordinating Officer Engineer Coleta Quindong at LGU-Calapan City sa pamamagitan ni City Agriculturist Lorelein Sevilla, naisakatuparan ang pagdiriwang ng 2020 Buwan ng Magsasaka’t Mangingisda kasabay ang paglulunsad ng Plant Plant Plant Program ni Kalihim William Dar sa Brgy. Sta. Maria Village, Calapan City nitong Mayo 26.
Layunin ng programang pagtuunan ng pansin ang kahalagahan ng agrikultura sa pagtataguyod ng pangmatagalang suplay ng pagkaing gulay para sa MiMaRoPa sa panahon ng Covid-19 community quarantine.
“Ang Calapan City ay isang major agricultural producer at sa panahong ito ng pandemic, dito nakikita ang kahalagahan ng agriculture”, mensahe ni City Mayor Panaligan, ika aniya “Sa quarantine, nagsara ang industriya, nagsara ang komersiyo – nagsara ang maraming establisiyemento pero, bukas ang agriculture upang matugunan ang food sufficiency hindi lang sa city-level kundi sa household-level.”
Pinaunlakan din nina Vice Mayor Gil Ramirez, Punong barangay Ave Deo Greg Cabrera, at Atty. Raymond Ussam na siyang nangangasiwa ng 300 metrong kwadradong lupain ginamit sa aktibidad.
“Mahalaga itong programa sapagkat kahit wala na itong sinasabi nating pandemic ay patuloy na mananatili ang pagkakaroon ng serving ng healthy food sa inyong lamesa”,ani City Agriculturist Sevilla.
Sa pagtutulungan nina APCO Coleta Quindong at Science Research Specialist II Genesis Castro, namigay ang DA-MiMaRoPa ng 800 na mga punlang gulay at isang sakong kalabasa sa lahat ng mga dumalo. Gayundin, namigay ng mga gulaying petsay si Atty. Raymond Ussam, ang tagapangasiwa ng gulayang pinagdausan ng selebrasyon.
Ganap din sa pagdiriwang ang patuloy na pagtakbo ng Kadiwa on Wheels ng kagawaran sa pagmamaneho ni Jonathan Atilano mula Gloria na nagsasabing, “Patuloy nating tangkilin ang mga magsasaka at ang kanilang gulayan sapagkat ang pagod nila ang patuloy na bumubuhay sa ating agrikultura.”
